November 2010 land Michelle en Eddie saam met hulle drielingseuntjies in Brisbane. Die seuns was amper vyf, en hulle het alles wat bekend was agtergelaat met die hoop op ’n ander toekoms vir hulle kinders.

​

Die begin was nie maklik nie. Michelle het die eerste Desember gehuil, op Kersdag gewerk en moes aanvaar dat haar Nursing-studies oorgedoen sou moes word. Eddie het aanvanklik by die kinders gebly en later ook sy Accounting-studies oorgedoen.

 

Net ses maande ná hulle aankoms het Michelle vier werwels by die werk beseer. Tussen finansiële druk, kinders grootmaak, studies,

emigrasie en ’n ernstige besering moes hulle eenvoudig aanhou bou.

 

“Emigrasie het my geleer dat jy met baie minder kan klaarkom wanneer jy besig is om iets nuuts te bou.”

 

Vandag, meer as 15 jaar later, is daardie drie klein seuntjies 21. Twee dien in die Army en die derde studeer Accounting.

 

Michelle se geloofspad het ook ’n besondere draai gemaak. In 2026, ná ongeveer 30 jaar, het sy weer haar Bybel oopgemaak — en teruggekyk met die besef dat God daar was, selfs toe sy dit nie besef het nie.

 

Haar raad aan nuwe immigrante is eenvoudig:

Gee jouself vyf jaar. Bewaar jou huwelik. Vind jou mense. Rus wanneer jy moeg is — en staan dan weer op.

 

En wanneer jy wonder of jy die regte besluit geneem het, onthou jou hoekom.

“Selfs wanneer jy dink jy is alleen, is jy nie. God is steeds saam met jou.”